लेखी मराठी मजकूर वाचून निवेदन करताना बोलीभाषेत 'लाईव्ह कन्व्हर्जन' करण्याची बहुतेक निवेदकांना सवय असते.
उदाहरणार्थ, छापील वाक्य जर असे असेल - "आजच्या प्रमुख पाहुण्यांनी याच महाविद्यालयातून पदवीपर्यंतचे शिक्षण घेतले व आपल्या माता-पित्यांनी पाहिलेले स्वप्न पूर्ण केले."
तर निवेदक बोलताना असे म्हणतील - "आजच्या प्रमुख पाहुण्यांनी याच महाविद्यालयातून पदवीपर्यंतचं शिक्षण घेतलं आणि आपल्या माता-पित्यांनी पाहिलेलं स्वप्न पूर्ण केलं."
यासंदर्भात एक किस्सा (बहुतेक सुधीर गाडगीळांकडून) ऐकलेला आठवतो, तो असा -
छापील वाक्य होते - "ललित साहित्याचा इतिहास सांगताना खांडेकर, खरे, खोटे, काळे, फडके, अशा अनेक प्रतिभावान लेखकांची नावे आवर्जून घ्यावी लागतील."
हे वाक्य निवेदनाच्या धुंदीत असे वाचले गेले - "ललित साहित्याचा इतिहास सांगताना खांडेकर, खरं, खोटं, काळं, फडकं, अशा अनेक प्रतिभावान..."
