ओळखी नव्हती तरीही, भेटावया आले मला
खांद्यावरी अपुल्या स्वत:च्या, वाहुनी नेले मला
ना कळे की पूर्वजन्मी, काय मी त्यांना दिले
इतके खरे की आज त्यांना, थँक्सही नाही दिले
- भाऊसाहेब पाटणकर
मृत्यो, अरे येतास जर का, थोडा असा आधी तरी
ऐकुनी जातास तूही, शेर एखादा तरी
एकही नाही कला तू, मानवांची पाहिली
जेथे जिथे गेलास त्यांची, मातीच नुसती पाहिली
- भाऊसाहेब पाटणकर
ऐसे नव्हे मृत्यूस आम्ही, केव्हाच नाही पाहिले
खूप आहे पाहिले त्या, प्रत्येक जन्मी पाहिले
मारिले आहे आम्हीही, मृत्यूस या प्रत्येकदा
नुसतेच ना मेलो आम्ही, जन्मलो प्रत्येकदा
- भाऊसाहेब पाटणकर
No comments:
Post a Comment